AI 做到由零至0.99

今時今日，你叫 AI 作個 Harry Potter 類型嘅故仔出嚟，佢會作到一個同類型、咁上下嘅故仔 — 呢個係由零至0.99；而由零至一，係由乜都冇，到一支掃把，到諗到 Quidditch World Cup 呢樣嘢出嚟。

今時今日，你叫 AI 分析股票市場，佢會好中肯咁以數據講晒啲可能性俾你聽 — 呢個係零至0.99；但學灘叔話齋，數據係要嚟破嘅。面對一個未知嘅未來，AI同人類一樣毫無頭緒，就好似 The Schrödinger's Cat 思想實驗 — 通往未來道門未俾人打開之前，未來根本唔存在，而喺你打開道門嘅嗰一刻，未來先至真正形成。

呢個世界最難嘅從來唔係由零去到0.99，而係點樣由0.99去到一。

如果2007年有2026年嘅AI，你叫佢設計一部必勝嘅手提電話，佢會俾你一張Blackberry咁嘅product design圖，然後同你講呢個係世界上90%或以上嘅人會接受嘅產品，有physical keyboard，必定會大賣；而同年喺Cupertino有一個痴線佬，向全世界展示一部iPhone，冇physical keyboard，同大家講呢個先至係世界嘅未來。

企喺同一個出發點，無論係AI定係Steve Jobs，未來都係一個未知數。

打破數據、Outlier性格、冒險，係人類嘅imperfections — 根據AI，呢啲係唔合理嘅決定；但同時，呢啲都係人類嘅gifts。

推進歷史，係靠一個又一個嘅black swan event；而推進人類文明，係靠一個又一個唔合理、outlier性格嘅人。